陀槍師姐｜宣萱最憎人遲到拍劇：熟讀劇本守時係演員應份做嘅事

HuangRance

　

陀槍師姐｜宣萱最憎人遲到拍劇：熟讀劇本守時係演員應份做嘅事

　

即時娛樂　

撰文：吳子生　　🕓　2021-02-01 23:04　最後更新日期：2021-02-01 23:04　

---

　

宣萱最唔鐘意人哋遲到。（梁碧玲攝）　

　

宣萱今日（1/2）現身將軍澳電視城出席無綫熱播劇集《陀槍師姐2021》宣傳造勢活動。宣萱透露拍攝過程相當開心：「因為劇情加埋演員又夾，後生嗰個都好乖，基本準時開工同熟讀劇本都做到足，大家都唔會做一啲唔應該做嘅嘢，咁所以大家做嘢會好順暢。（有咩嘢佢哋係唔應該做？）遲到囉！因為呢樣嘢係我死穴。不過佢哋之前應該收晒風，知道我唔鍾意人哋遲到，因為守時同熟讀劇本係演員基本應份要做嘅事。」

　

　

宣萱認為演員熟讀劇本同守時是基本責任。（梁碧玲攝）　

　

宣萱透露曾經初入行時，唔知醒瞓過籠拍劇遲到，嚇到驚惶失措：「因為嗰排日日開工，只係瞓得幾個鐘，突然有一日唔知係咪個鬧鐘唔識響定自己聽唔到，當我擘大眼嘅即時候已經過晒鐘，嚇到即刻洗面刷牙就衝出門口，停係紅綠燈度都要化妝，返到公司不停同人講對唔住，因為自己唔鍾意人哋遲到，所以自己都要做到一樣唔可以遲到。」

　

現場氣氛熱鬧。（梁碧玲攝）　

---

　

演員大合照。（梁碧玲攝）